Po ju pse po ikni
Pse pa ne të tjerët
Ku vini ku shkoni ku niseni
Po ne ku na lini pse vetëm
Pse vetëm ne vetëm pse
Ju ikni ne rrimë nuk ikim
Mbetemi pa ikur si pemët
Në djerrinë si gurët ku kujtoni
Se po ikni ç’iluzione
Ç’ikuzione jua lëvizin
Shputat këpucët gjurmët
Në dheun e djegur të rrugës
Ku kujtoni se po na lini
Ne që mbetemi që nuk ikim
Ne që nuk na bëjnë këmbët
Galloshet çizmet opingat
Nëna gjurmësh të vjetra
Mbetur në dheun e rreshkur
Në fytyrën e rreshkur të rrugës
Vrragë të një përdhunimi
Përndryshe të falur
Të përligjur të kuptuar
Nga të urtët e të drejtët
Ju që filloni të hiqeni
Zvarrë në shtratin e tharë
Të përroit që lini pas.
No comments:
Post a Comment